Bywha dy waith, O Arglwydd mawr

Bywha dy waith, O Arglwydd mawr,
dros holl derfynau’r ddaear lawr
drwy roi tywalltiad nerthol iawn
o’r Ysbryd Glân a’i ddwyfol ddawn.

Bywha dy waith o fewn ein tir,
arddeliad mawr fo ar y gwir;
mewn nerth y bo’r Efengyl lawn,
er iachawdwriaeth llawer iawn.

Bywha dy waith o fewn dy dŷ
a gwna dy weision oll yn hy:
gwisg hwynt â nerth yr Ysbryd Glân,
a’th air o’u mewn fo megis tân.

Bywha dy waith, O Arglwydd mawr,
yn ein calonnau ninnau nawr,
er marwhau pob pechod cas,
a chynnydd i bob nefol ras.

MINIMUS (John Roberts), 1808-80

(Caneuon Ffydd 243)